Entziklopedia askearen aplikazioa Android eta iOS sistemetarako eskuragarri dago; tresna hori jaitsiz gero, euskara aukera daiteke hizkuntza bakar gisa edo beste batzuakaz batera. Gainera, gure hizkuntza lehenetsiz gero, hurrengo eguneraketan menu denak euskaraz agertuko dira.
Wikipediaren aplikazioak aukera asko ematen ditu sakelako telefonoaren bidez informazio denera heltzeko. Artikuluak hainbat hizkuntzatan bilatzeko aukera ematen du, norberak ezarritako hobespenen arabera, eta azken egunean gehien kontsultatu diren artikuluak eskaintzen ditu egunero. Gainera, egunero argazki bat proposatzen du, Commonseko komunitateak kalitate handiko irudi gisa bozkatu dutena.
Itzulpen-lan hori hirugarrena da Euskal Wikilarien Kultur Elkarteak eta Azkue fundazioak ikasturte honetan egin dutena, bien arteko akordioaren ostean. Aurretik, OpenStreetMap eta Wikipediako softwarea itzuli zituzten. Erakunde biek azaldu dutenez, "itzulpen-lanakaz segituko dugu, eta datozen asteotan beste software batzuk ere euskaraz izango ditugu, denok eskuratu ahal dezagun ezagutza gure hizkuntzan".