Kultura  Uribe Kosta 2018-03-07 18:49

Uribe Kostako bertsolari gazteak, BBK Sariketako finalaurrekoetara

Lea-Artibairi irabazi zioten atzo, martitzenean, Markina-Xemeinen jokatutako kanporaketan.

Uribe Kostako bertsolari gazteak, BBK Sariketako finalaurrekoetara
Paule Loizaga sopeloztarra atzoko kanporaketan bertsotan. © BIZKAIKO BERTSOZALE ELKARTEA | Ikusi handiago | Argazki originala

Bertsolari Gazteen XXVI. BBK Sariketako lehenengo fasea amaitu zen atzo: laugarren eta azken kanporaketa jokatu zuten Markina-Xemeingo kultura aretoan, herriko ikastetxe bietako publiko gaztearen aurrean. Kanpoko taldeak, Uribe Kostak, 390,5 puntu batu zituen eta, beraz, finalaurrekoetan egoteko eskubidea lortu dute. Etxekoek, Lea-Artibaiko taldekoek, 343 puntugaz konformatu behar izan zuten.

Uribe Kostako seikotean ondoko bertsolariak egon ziren: Aritz Landeta, Maider Barañano eta Naroa Torralba, 18 urtera artekoetan; eta Paule Loizaga, Unai Mendiburu eta Kerman Diaz, 24 urtera artekoetan. Lea-Artibairen ordezkari, Antton Bereziartua, Eneko Barruetabeña eta Bittor Altube egon ziren gazteetan; nagusietan, Alexander Idoeta, Aitor Ruiz eta Nahia Ibarzabal.

Atzoko saioko aurkezlea Ainhoa Urien izan zen, eta epaimahaia Inazio Vidalek, Juanjo Respaldizak eta Miriam Juaristik osatu zuten. Idazkari lanetan Maddi Ibaibarriaga ibili zen.

Uribe Kostak BBK Sariketako bigarren finalaurrekoa jokatuko du, hilaren 13an, Sopelako Ander Deuna ikastolan, 09:30ean. Hego Uribeko seikotea izango du aurrez aurre. Beste finalaurrekoa, berriz, bezperan, 12an, izango da, Durangon, Durangaldearen eta Busturialdearen artean. Finala 22an izango da, Bilbon.

2018/03/13 09:30

Sopelako Ander Deuna ikastola Uribe Kosta

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa