Sortzaile izateko aukera emango du Azkue Fundazioak, web-teknologiak erabilita

Azkue Fundazioak, Talaios Kooperatibagaz elkarlanean, teknologiagaz lotutako ikastaro-sorta antolatu du; hilabete honetan, urrian, izango da horietako bigarrena: "Izan sortzaile: web-teknologiak ikasten" izenburupean.

Izan ere, web-teknologiak konturatu ere egin barik erabiltzen ditugu egunerokoan, baina ez ditugu benetan ezagutzen. Horregatik, horiek ezagutzen hasteko, sei esperimentuko bide-orri txiki bat definituko dute ikastaro horretan, gustuko dutenak ezagutza horiekaz saltsatzen hasteko.

  • Parte-hartzaileek egunkari digital baten tripak ezagutu eta portada propioa idatziko dute.
  • Maite dituzten hiru gauzari buruzko web sinple bat egin.
  • Web-meme bat, web-komiki bat eta web-postal interaktibo bat.
  • Sakelako telefonoetarako edukia eta istorioak sortu.

Eta lan horietarako, Mozilla Fundazioaren X-ray Goggles, Thimble eta Webmaker tresna errazak erabiliko dituzte.

Ikastaroa urriaren 26ko eta 27ko aste bukaeran izango da: barikuan, goizez eta arratsaldez, eta zapatuan goizez.

Informazio gehiagorako edo izena emateko: Azkuefundazioa.eus

Ez ahaztu edonorentzat aproposak diren doako ikastaroak direla eta animatu teknologiaren ur handitan sartzera!

Ekimenaren kartela