Aipatutako hezkuntza-zentro bi horiez gainera, Bilboko Maristak ikastetxeak ere bat egingo du ekimenagaz. Iaz Gurutzetako Alazte zentroak martxan ipini zuen; ikastetxe hori izan zen lehenengoa EAEn egitasmo hau indarrean jartzen.
Egitasmo berritzaile horrek eskola-jazarpena saihesteko prozesuen protagonista bihurtzen ditu nagusiagoak diren ikasleak eta, horrez gainera, arazoaren irtenbidea haien eskuetan ipintzen du. Berdinen Arteko Tutoretza izeneko ekimena indarrean sartu aurretik, Erandioko Jado-Compasión ikastetxeak Hezkuntza Orientaziorako katedratikoa eta irakaslea den Andrés González Bellido gonbidatu zuen iaz, berbaldi bat emateko. Egitasmoaren sustatzailea eta psikologoa ere bada: Bartzelonako Unibertsitateko Hezkuntza Zientzietako Institutuan garatu zuten proiektua.
Ikasleak protagonista
Duela 17 urte martxan ipini zenetik, Haur Hezkuntzako, Lehen Hezkuntzako eta Bigarren Hezkuntzako mila zentro baino gehiagotan indarrean dago. Beste egitasmoakaz daukan aldea da "ikasleak protagonista bihurtzen dituela; baina, zaintzaile-lanak egin behar izan barik". "Kontzientziaziorako, hobe da aurrea hartzea, ondoren damutu behar izatea baino", esan zien gurasoei González Bellidok. Estatu espainolean 2002-2003 ikasturtean indarrean ipini zutenetik, milioi bat ikasle baino gehiagok parte hartu dute ekimenean.
Gainera, Hego Amerikako, Amerikako Estatu Batuetako eta Ingalaterrako ikastetxeetan ere jarri dute martxan. Sustatzaileen berbetan, Berdinen Arteko Tutoretzari esker, "eskola-jazarpeneko egoeren %95 desagertzen da, eraso fisikoak erdira jaisten dira eta, ikastetxearen barruan, bizikidetza zeharo hobetzen da".