Euskaraldiaren 11 egunetan zehar hizkuntza-ohiturak aldatzea izango da helburua eta, hori errazteko, ohiturak aztertu eta euskarari ekitea gomendatzen dute antolatzaileek. Halaber, zailtasunen aurrean amore ez ematea, hartutako erabakiari eustea eta ikurra agerian eroatea eskatzen dute.
Uribe Kostako herrietako ekitaldi denak HIRUKAk atera duen gailu mugikorretarako app-an kontsulta daitezke. Hemen klik egitez eskura daiteke.
Izen-emate datuak
Euskal Herri osoan, denera 196.000 lagunek eman dute izena Euskaraldian, parte-hartze zabala izango da beraz gaur martxan ipiniko den ariketan. Partaide horietatik %74ek eman dute ahobizi modura jarduteko izena eta %26 arituko da belarriprest rolean.
Lurraldez lurralde, hauek dira partaidetza datuak:
- Araban 17.500
- Bizkaian 68.500
- Gipuzkoan 84.000
- Ipar Euskal Herrian 5.500
- Nafarroan 20.500
Partaideen ezaugarriei dagokienez, izena eman dutenen %63a emakumezkoa izan dela azpimarratu da, eta, adinari dagokionez, 16 urtetik gorako adin guztietako belarriprest eta ahobiziek egingo dute azaroaren 23an hasi eta abenduaren 3an amaituko den ariketa. Bereziki azpimarratu da gazteen artean harrera oso ona izan duela ekimenak. Honela banatu dira izen-emateak adin tartearen arabera:
- 16 eta 25 urte bitartean ditu izena emandakoen %18ak.
- 26 eta 35 urte artean %18ak.
- 36 eta 45 urte artean %28ak.
- 46 eta 55 urte artean %19ak.
- 56 eta 65 urte artean %12ak.
- 65 urte baino gehiago %5ak.
Ariketa prestatzeko aurrelanetan milaka lagun prestaketa saioetan aritu direla ere azaldu dute Euskaraldiko bozeramaleek, ahalduntze ariketa garrantzitsu bat izaten ari denaren erakusgarri modura.
Gaurko ekitaldiak
Berango
Azaroak 23, barikua
- 18:00 Euskara-eskola hasiberrientzat, talo-janagaz, Stay and Job egoitzan.
- 19:45 Kalejira Sabino Arana kalera. Horren ostean, argazki-erraldoia udal-pilotalekuan.
Erandio
Azaroak 23, barikua
- 19:30 Hasiera-ekitaldia, Irailaren 23a plazan. Horren ostean, Kantagunea.
Getxo
Azaroak 23, barikua
- 17:30 Irekiera-ekitaldiak, Telletxen, Xake plazan, Bidezabalen eta Malakaten.
Gorliz
Azaroak 23, barikua
- 20:00 Euskaraldiari ondo-etorria, Burrunba elektro-txaranga ibiltariagaz.
Leioa
Azaroak 23, barikua
- 19:30 Hasiera-ekitaldia, Boulevardean. Dantzak, bertsoak, txalaparta, txistulariak eta Euskaraldiaren koreografia ikasteko saioa egongo dira.
Leioako campusa
Azaroaren 23tik Abenduaren 3ra arte
Arte Ederretako Fakultatetik urriaren 10ean zabaldu den ideia lehiaketan aukeratuko diren ekintzak (ekintza performatiboak, esku-hartze artistikoak, esku-hartze muralak edota bestelakoak) garatuko dira.
Lemoiz
Azaroak 23, barikua
- 19:30 Mintza-poteoa, Armintzan.
Plentzia
Azaroak 23, barikua
- 19:00 Ondo-etorria, Ontziola plazan. Bertoko hamaikakoaren agerraldia eta Tor magoaren saioa egongo dira.
Sopela
Azaroak 23, barikua
- 19:00 Kantu-jira herrian zehar, udaletxetik abiatuta.