Javi Aranguena: "Gazteen artean euskararen erabilera sustatzea da Gurot aplikazioaren helburua"

Argazkia: HODEI TORRES

Gurot aplikazioa 12 eta 17 urteko gazteen artean "euskara sustatzea helburu" sortu zuten 2018ko abenduan. Aplikazioaren xehetasunak Getxoko Euskara teknikariak eman dizkigu, Javi Aranguena Aspiazuk (Aulesti, 1968).

Nola sortu zen Gurot?

Orain dela hiru bat urte Koldo Zuazok eta Urtzi Goiti EHUko irakasleek liburua atera zuten: Uribe Kosta, Txorierri eta Mungialdeko euskara. Pentsatu genuen merezi zuela bigarren pausoa egiteak, eta bertan zegoen materiala erabili genuen gazteentzako aplikazio hau sortuz liburuan aipatzen diren herrietarako.

Zein da proiektuaren helburua?

Gazteen artean euskararen erabilera sustatzea eta euren artean erabiltzeko ohitura bultzatzea. Badakigu asko aritzen direla gazteak Interneten, sare sozialetan eta jokoetan. Burua sartu nahi dugu hor.

Zein da formatua?

Kultura orokorreko galderak daude aplikazioan, formatua Trivial-aren antzekoa da. Aurrez aipatutako liburuaren inguruan ere zenbait kontu daude. Joseba Santxo bertsolari getxoztarrak prestatu zituen galderak.

Hesian taldeak, besteak beste, bat egin du ekimenagaz…

Hala da, honetan laguntzen du, eta euren sare sozialen bitartez hau mugitzen ari dira. Ekainerako Guroten puntu gehien lortu dituztenen artean zozketa egingo dugu. Irabazleek Hesian taldearen backstage-ra joateko aukera izango dute, edo mugikor bat irabaztekoa, besteak beste.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun