Bilboko Kirikiño eta Barrikako barrika Barrik antolatu dute ekimena, "zahartze aktiboa sustatu eta adinekoen gizarte-integrazioaren alde egiteko", euren esanetan. Horretarako, beste kolektibo batzuekaz harremana estutu gura dute, besteak beste.
11:00etan hasiko da topaketa, eta 13:00ak arte iraungo du gutxi gorabehera. Ekintzetako bat zahar-egoitzetan bizi direnek eta Plentzia Eskolako umeek elkarregaz egingo dituzten joko bereziak dira. Horietan, umeek hainbat proba eta oztopo gainditu beharko dituzte begi bat estalita edo hankak elkarri lotuta dituztela, edota gurpildun aulkian doazela. Modu horretan, hobeto ulertu ahal izango dute zer sentitzen den gaitasun-murrizketa eta menpekotasuna izanda. Gainera, adinekoek eta umeek elkarregaz dantza egingo dute.
Zahar-egoitzetako egoiliarrek azken urtean egindako elkartasunezko hainbat ekimenetan jasotako dirua emango diote momentuan bertan jakinaraziko elkarte bati, laguntza behar duten pertsonen alde egindako lana saritzeko.
