Bilbo Hiria Irratiaren 22. urteurreneko jaian parte hartuko du HIRUKAk bihar

© GABRIEL ARESTI EUSKALTEGIA

Kalera aterako da Bilbo Hiria Irratia 22. urtebetetzea ospatzeko, eta berriki ukatu zaion lizentzia aldarrikatzeko. Bihar, goiz osoan, Albiako lorategietatik zuzeneko emisioa egingo dute, kolaboratzaile ugariren parte-hartzea eta guzti. HIRUKA izango da horietako bat.

Goizeko 10:00etatim arratsaldeko 14:30era, irratsaio laburrak, elkarrizketak, antzerki sketch-ak, lehiaketak, mahai-inguruak, bertsoak eta zuzeneko musika izango dira Albiako lorategian, Bilbo Hiria Irratiak egoitza duen lekutik oso hurbil. 

HIRUKA ere han izango da. Hilabetero bezala, aldizkariko eduki garrantzitsuenen berri emateko baliatuko dugu Bilbo Hiriaren mikrofonoa; oraingoan, gainera, euskarazko herri-komunikabide txikien egoeraz hausnartuko dugu, beste gonbidatu batzuekaz batera.

Ospakizunari aldarrikapena gehitu gura izan diote irratiko arduradunek. Izan ere, eskubidez dagokion baina ukatu egin zaion lizentzia zor zaiola gogoratzeko baliatu gura du ekitaldia Bilboko euskal irratiak.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun