Hainbat herritako ur-hornidurari eragin dion matxura baten berri eman du Ur Partzuergoak

Besteak beste Barrika, Sopela eta Urdulizko ur-horniduran arazoak sortu dituen matxura bat gertatu zen atzo iluntzeko 22:00etan, Kurkudiko (Leioa) ur-biltegiko balbula batean. Zenbait herritan ur-falta sumatu da gaur eguerditik.

Bilbao Bizkaia Ur Partzuergoaren esanetan, gau osoa eman dute konponketak egiten, baina hala ere gaurko 11:00etatik hasi da hornidura-falta igartzen Barrikan, Sopelan eta Urdulizen, baita Gatikan, Jataben eta Laukizen ere. Ez dute argitu zer arazo izan duen Kurkudiko biltegiko balbulak.

Arratsaldean zehar hornidurak apurka-apurka bere onera egingo badu ere, baliteke momentu batzuetan ura guztiz garbi ez irtetea txorrotatik, ohartarazi dutenez. Kasu horretan, ez edateko gomendatu dute, beste edozein gauzatarako lasai erabil daitekeen arren, betiere Partzuergoaren esanetan. Badaezpada, 11.000 litro ur edangarri duten zisterna-kamioi bi bidali dituzte populazio handienetako guneetara.

Edozein zalantza argitzeko, Partzuergoaren 94 487 31 87 telefono-zenbakira dei daitekeela gaineratu dute.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun