Infografia interaktiboa

Migrazioa Uribe Kostan, azterbide

Migrazioa mundu osoan ematen den fenomenoa da; betidanik existitu egin da. Leku batetik bestera mugitzea gizon-emakumeen garapena bermatzeko ezinbesteko ekintza da, behar-beharrezkoa. Hala ere, mugimendu horien inguruan hainbat eztabaida piztu dira azkenaldian, xenofobia hauspotzen duen hainbat klixe, zurrumurru eta gezurrez josita. Kalean bolo-bolo dabiltzan datu faltsuok desmuntatzeko hainbat eduki sortuko ditugu hemendik aurrera; hona hemen lehenengoa: Uribe Kostako pertsona migratzaileen errealitatea azaltzen duen infografia interaktiboa.

Kalean askotan entzun ohi da pertsona migratzaile "gehiegi" dagoela inguruotan. Baina, benetan hala da? Eustatek emandako datuen arabera, kanpoko jatorria dutenen zenbatekoa ez da % 10 baino gehiagora heltzen gurean, eta herri txikietan kopuru hori askoz ere txikiagoa da, % 5 ingurukoa. Eta, nongoak dira gurera datozen gizon-emakumeak? Denetarik aurki daiteke, mundu osotik etorritakoak baititugu gure artean; baina denetan populazio handiena osatzen dutenak Hego Amerikatik heldutakoak dira. Ondoren Europan jatorria dutenak daude, eta gutxiena Afrikakoak; Magrebtarrak eta Saharaz azpikoak, hain zuzen ere.

Pertsona migratzaileen joan-etorria gurean ere gorabeheratsua da urtez urte. 2001etik 2007ra bitartean nabarmen gora egin zuten migrazioak gurera; urte horretatik gaur egunera arte, ordea, etortzen direnen zenbatekoak mantendu edo behera egin du kasu askotan. Zergatik? Erantzuna hurrengo atalerako utziko dugu.

 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun