Hazinnova aholkularitza-zerbitzua aurkeztu diete Uribe Kostako, Mungialdeko eta Txorierriko enpresa txiki-ertainei

Gaurko agerraldiko partaideak. © INNOBASQUE

SPRI Taldeak eta Innobasquek martxan ipinitako Hazinnova, enpresa txiki eta ertainentzako (ETE) aholkularitza-zerbitzua aurkeztu dute gaur Sondikan egindako ekitaldi batean. Besteak beste Leioako eta Uribe Kostako Behargintzako ordezkariek parte hartu dute, baita eskualdeko hainbat enpresatako kideek ere. Hazinnovaren helburua berrikuntza ez teknologikoko proiektu txikiak gauzatzen laguntzea da.

"ETEek berrikuntza ez teknologikoaren arloan lehenbiziko urratsak emateko" tresna da Hazinnova, Innobasqueren izenean Alaitz Landaluzek azaldu duenez. izan ere, inguruko enpresen erronketako bat horixe dela azpimarratu du Landaluzek, arlo horretan "hobekuntzarako tartea" egon badago eta.

SPRI Taldeko Josu Ocarizek argitu du Hazinnova zer den: "Doako aholkularitza eta laguntza eskaintzen du, berrikuntza ez teknologikoko mikro-proiektuak ezartzeko; proiektu txikiak dira baina eragin handikoak, epe laburrean emaitzak dituztenak". Hain zuzen, gure eskualdean eta inguruen zerbitzu hori enpresetara ailegatzeaz arduratuko diren bitartekariak egon dira agerraldian: Leioako, Uribe Kostako Mankomunitateko eta Mungialdeko Behargintza, eta ekitaldia antolatu duen EGAZ Txorierri.

Azkenik, zenbait enpresatako ordezkariek eremu horretan izandako esperientziak azaldu dituzte, tartean Plentziako Crusoe Treasure ur azpiko upategiak.