Koronabirusa Uribe Kostan

Osasun-langileentzat materialak prestatzeko deia egin diete 3D inprimagailua dutenei

3D inprimagailuak erabilita osasun langileentzako biserak egiten hasi dira. @KOLDOARTOLA

Koronabirusari aurre egiteko maker komunitatea sortu dute EAEn, 3D inprimagailuak erabilita osasun-langileentzako materiala egiteko. Laster gaixoentzako arnasgailuak egingo dituztela iragarri duten arren, une honetan langileentzako biserak egiten ari dira, adituek eurek onartutako diseinuetan oinarrituta.

Koronabirusaren aurkako Euskadiko Maker-en Komunitatea jo eta ke ari da lanean egunotan. Daborduko 800 kide baino gehiago batu dira lanen nondik norakoak azaltzeko eta horri ekiteko. Ideia da 3D inprimagailuak erabilita gaixoentzat arnasgailuak egitea, Reesistencia Team taldeak egindako prototipoaren diseinuan oinarrituta; hala ere, oraingoz osasun-langileentzat biserak egitean jarri dute lehentasuna. 

Egitasmo horretan parte hartu gura dutenentzako planoak jarri dituzten euren webgunean. Behin materiala egin ondoren, komunitatearen koordinatzaileakaz jarri beharko da harremanetan, planoak dauden webgunearen bitartez.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun