Koronabirusa Uribe Kostan

Etxean egiteko jarduerak online eskaintzen hasi dira Barrikako eta Berangoko udalak

Zeregin handirik bako ordua betetzeko ekimen eta proposamenak barra-barra ugaritu dira Espainiako Gobernuak etxe barruko konfinamendua agindu zuenetik. Egunotan, Barrikako eta Berango udalek ere internet bidezko hainbat ekimen ipini dituzte martxan, helburu horrexegaz beragaz.

Berangori dagokionez, Kultur Etxearen facebook orria baliatu dute adin guztietako pertsonei jarduerak proposatzeko. Orain arte talde bi sortu dira: adinekoek etxean gimnasia egiteko bata, eta Berango Etxean izenekoa bestea. Bigarren horretan, aukera egongo da "jarduera atsegingarri eta parte-hartzaile bat daukatenek" besteakaz partekatzeko: berba gurutzatuak, letra-zopak, esaera zaharrak, asmakizunak, tutorialak...

Bestalde, Udalak gogorarazi du bere jarduera guztien gaineko informazioa eta osasun-alertaren gomendioak ikusbide dituela www.facebook.com/berango web orrian.

Barrika Etxean

Ildo berekoa da Barrikako Udaleko Kultur Sailak eta bertako liburutegiak sortu duten Barrika Etxean blog interaktiboa. Azaldu dutenez, "liburutegiko arduradunak eskulanei buruzko bideoak eta/edo tutorialak jarriko ditu, adin guztietako jendearentzat, baita gastronomia tailerrak, irakurgaien gomendioak, ipuinen bideoak, esperimentuen bideoak eta abar ere. Guztiak ele bitan izango dira. Halaber, parte-hartzaileek beren jarduerak eta iradokizunak bidali ahal izango dituzte, barrikaetxean@gmail.com helbidea erabilita, hurrengo egunetan erabiltzeko".

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun