Koronabirusa Uribe Kostan

Herrietako COVID-19aren datuak emateari utzi dio Eusko Jaurlaritzak

Koronabirusaren pandemia hasi eta gutxira hasi zen Osakidetza kutsatuen kopurua jakinarazteko txostena argitaratzen. Besteak beste, herriz herrikako datuak eskaintzen zituen, baita ospitaleratzeen kopurua ere; hala ere, atzo, maiatzaren 14an, hori egiteari utzi zioten.

HIRUKA Eusko Jaurlaritzako prentsa zerbitzuagaz harremanetan jartzen saiatu da, baina ez du inolako erantzunik jaso. Aiaraldea hedabideak, baina, erakundearen azalpenak jaso ditu eta adierazi diote positiboen kopurua "jaitsi dela eta, ondorioz, ikertzen ari direla nola landuko duten daukaten informazioa". Momentuz, baina, ez dirudi jakinaraziko duenik zein izaten ari den pandemiaren bilakaera herriz herri. Gogoratu behar da azken egunetako normalizazio positiboaren ondoren, gorakada nabarmena izan duela kutsatuen kopuruak Uribe Kostan aste honetan.

Alarma egoera hasi eta segituan hasi zen HIRUKA Uribe Kostako bilakaeraren jarraipena egiten egunero, Osakidetzak sareratzen zuen txostena eta Eusko Jaurlaritzaren Open Datako datuak erabilita. Atzo, ordea, ez zuten orain arteko datuen berri eman eta baliteke horrela segitzea hemendik aurrera ere. Gaur azalduko du Eusko Jaurlaritzak zein izango den informazioa emateko modu berria.

Eusko Jaurlaritzako prentsa zerbitzuak Aiaraldea hedabideari argitu dionez, datu horiek eskuratzeko modu bakarra txostena da eta, momentuz, ez dute horren berri emango Jaurlaritzak ez badu gaur, barikuan, kontrakoa erabakitzen.

Osakidetzak COVID-19aren inguruko txostena sareratzen jarraitzen du, baina datu orokorrakaz bakarrik. Berbarako, atzo PCR eta test azkarrak erabilita atzemandako 157 positibo gehiagoren berri eman zuten (18.316 denera) eta 12 pertsona gehiago zendu zen (1.454 denera). Oinarrizko birsorkuntza tasa EAEn, aldiz, 0.85koa dela argitu zuten; azken horren harira, herrialdez herrialdeko datuak emateari utzi zioten baita ere.

Maiatzaren 12ra arteko bilakaeraren infografia (maiatzaren 13ko datuak ez dituzte sareratu):

 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun