Uribe Kostako Mankomunitatearen Ukanauto zerbitzua datorren astean bueltatuko da

© URIBE KOSTAKO MANKOMUNITATEA

Alarma-egoera dela eta etenda egon den Ukanauto, autoa alokatzeko zerbitzu publiko, ekainaren 1etik egongo da berriro indarrean, Uribe Kostako Mankomunitateak adierazi duenez. Erabiltzean higiene-neurriak betetzeko jarraibideak argitaratu dituzte.

Fase berrian hainbat gomendio zabaldu ditu Mankomunitateak, Ukanauto erabiltzeko asmoa dutenentzat. Erreserbak telefonoz egin beharko direla adierazi dute, eta osasuna babesteko hainbat neurri bete.

Besteak beste, ukipen-gainazalak desinfektatzeko eta autoak erabiltzen diren denbora guztian botatzeko moduko eskularruak janzteko eskatu dute. Ibilgailuetan halakoak egongo dira, baita gel hidroalkoholikoa ere. Bidaia hasi aurretik eta ondoren behar bezalako garbiketa egin beharra dago, horiek erabilita.

Gainera, maskara derrigorrez ipini beharra dago, azken aginduei jarraituz, eta ibilgailura sartzerakoan barruan dagoen airea ateratzeko leiho bat osorik zabaldu eta beste aldeko atea hainbat aldiz ireki eta ixteko gomendatzen dute. Ondoren hartu beharko dira eskularruak autoaren gordetegian, eta eskuak gelez garbitu ostean jantzi.

Gidatzen hasi baino lehen, gehien ukitzen diren aldeak garbitu beharko dira: bolantea, aginte-koadroa, aurreko panela eta martxa-palankaren heldulekua. Gidatzean, lantzean behin leihoa zabaltzeko ere gomendatzen da.  

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun