Ekialdera begira

Zaila da gaur egun idazteko asmoz pantaila zuriaren aurrean jartzea COVID-19 delako horrekin topaketa izan barik. Saihesten saiatu arren, egoitzetako nagusi abandonatu eta hilak datozkizu gogora; Hezkuntzako agintariek, hangoek eta hemengoek, hartu beharko lituzketen erabakiak, gerora hartu ez dituztenak; edota datorren ikasturtea zenbat aldiz diseinatu duten, ratioak, asistentzia txandakatua, otorduak… Gerora babes maskara baino ez geratzeko.

Urrun geratzen zaigu paper higienikoarekiko obsesioa, eta maskararen mespretxua Bai, pandemia honen ostean ere izango da maskara gure artean. Barregarri iruditzen zitzaigun lehen Asia aldean pertsona gaixotuengan ikusten genuenean. Bada, ez egin barre, komunitate kontzientzia deitzen zaio horri. Mundu guztiarengandik ikas daiteke. 

Are gehiago, lastima ekialdetik gehiago ikasi ez izana. Beste kuku batek joko zigukeen, eta topatzen garenean ez ginatekeen irrigarri geratuko. Ez naiz ari ospitaleak modu meteorikoan eraikitzeaz, edota jagoletza teknologiko harrigarri bezain beldurgarriaz, edota gure artean ezinezko izango liratekeen bestelako segurtasun neurriak ipintzeaz. Ez dut ezinezkoez hitz egiten.

Eta okerrena: ez genukeen ekialdera begira denbora gehiegi eman beharko, ohitura hori gure artean aspaldi dago eta. Guztiok ezagutzen ditugu kirola bihurtu diren judoa, karatea edo taekwondoa bezalako borrokak, baita praktikatu barik ere. Baina inori ez zaio bururatu kultura horietan errespetua eta adiskidetzea adierazteko modua inportatzea: aurrez aurre jarri, begietara beha eta burua pittin bat makurtu. Guk, mendebaldekoak garenez gero, irribarretxo bat gehi genezakeen, eta agur txit polita izango genukeen, ukitu eta hurbildu beharrik gabe ere. Nork demontre asmatu du, ordea, ukondoen arteko agur ziztrin hori, hezurren arteko ukitu hotz hori? Ergelagorik?

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun