Bizkaiko Bertsolari Txapelketarako sailkapen-faseko saio bana egingo dute Berangon eta Getxon

Aurreko txapelketa bateko artxiboko irudia.

Udaberrian egitekoa zen Bizkaiko Bertsolari Txapelketarako sailkapen-fasea irailean egingo da, COVID-19agatik. Hala ere, jatorrizko izenari eutsi diote antolatzaileek: Udabarria Bertsotan. 60 bertsolari daude parte hartzeko izena emanda, horietatik zortzi Uribe Kostakoak, eta saio bi egingo dira eskualdean, irailaren 17an eta 18an.  

Sailkapen-faseak, denera, hamar saio izango ditu, iraileko bost egunetan egingo direnak: 16, 17, 18, 23 eta 24. Egunero saio bi egingo dira ordu berean, 18:30ean. Uribe Kostari dagokionez, lehenengo saioa irailaren 17an egingo dute Getxoko Muxikebarri zentroko Arrigunaga aretoan; eskualdeko ordezkari bik jardungo dute saio horretan: Aritz Landeta getxoztarrak eta Paule Ixiar Loizaga sopeloztarrak. Hurrengo egunean, berriz, Berango Antzokian egingo dute kanporaketa, Beñat Vidal leioaztarra gai-jartzaile dela.

Horiez gain, Inazio Vidal (Leioa) eta Peru de Pedro (Gorliz) egoingo dira irailaren 16an Lekeition egingo den saioan, Peru Vidal (Leioa) irailaren 17an lehiatuko da Busturian, Peru Irastortza algortarrak 23an jardungo du Muxikan, eta egun berean, baina Berrizen, Aitor Esteban urduliztarraren txanda izango da. Orozkoko saioan (irailak 16) Oier Iturralde itzubaltzetarra izango da gai-jartzailea, eta Deriokoan (irailak 24), Olatz Larrinaga algortarra.

Txapelketa, urritik

Txapelketa bera urrian hasiko da, "printzipioz", Bizkaiko Bertsozale Elkartearen esanetan. 2016an finalista izandakoak eta 2018an finalaurrekoetara ailegatu zirenak zuzenean sartuko dira lehenengo-kanporaketa fasera. Denera 36 bertsolarik parte hartuko dute horretan; 2016ko finalistetatik eta 2018ko finalaurrekoetara ailegatu zirenetatik zenbatek ematen duten izena jakindakoan, zehaztu ahal izango da iraileko sailkapen-fasean zenbatek egingo duten aurrera.

Sei kanporaketa-saio egingo dira, eta ondoren, finalaurrekoetako beste hiru. Orain dela urte biko finalistak zuzenean sartuko dira fase horretara. Azkenik, zortzi bertsolari egongo dira finalean. Oraindino ikusteko dago non eta noiz.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun