Koronabirusa Uribe Kostan

"Espero dezagun epe laburrean gure funtzioaren beharrik ez izatea. Adi egongo gara"

Gorliz, Lemoiz eta Plentziako Zaintza Sareak bere jarduna etetea erabaki du. Arduradunek ohar baten bitartez azaldu dutenez, konfinamenduaren arintzearen ondoren lanean jarraitzeko erabakia hartu zuten arren, gaur egungo testuingurua aldatu egin dela ondorioztatu eta euren lana "behin-behinekoz amaitutzat" ematea erabaki dute.

Inguruko beste hainbat udalerritan gertatu zen legez, COVID-19aren pandemiaren erdi-erdian sortu zuten Gorliz, Lemoiz eta Plentziako zaintza sarea, "erakundeek artatzen ez zituzten sektoreen beharrei erantzuteko", azaldu dutenez. Sarearen jarduna aurrera eraman ahal izateko hainbat erakundegaz egon dira elkarlanean, hala nola Gurutze Gorria eta Gorlizko Udala. "Eskerrak eman behar dizkiegu emandako laguntzagatik, baita pertsona anonimoek, hiru herrietako elkarteek zein merkataritza establezimenduek emandako laguntzagatik ere. Haiek gabe, ez ginen honaino iritsiko", adierazi dute sareen bitartez zabaldutako ohar batean.

Bidean hainbat oztopo topatu dituztela azaldu dute; hala ere, pertsona askoren elkartasun eta talde-lanari esker horiei denei aurre egitea lortu dutela azpimarratu dute: "Ika-miketatik haratago lanean jarraitu dugu". Konfinamendua arintzea iraun bitartean ere lanean jarraituko zutela erabaki zuten sare horretako boluntarioek, "oraingoan inongo erakunderen laguntzarik gabe eta hasitako bideak iraungitze-data zuela jakinda". Orain baina, "bizi dugun testuingurua aldatu egin dela eta harremanetan geunden familiak beste egoera batean daudela ikusi ondoren", euren lana behin behinekoz amaitutzat ematea erabaki dute. "Espero dezagun epe laburrean gure funtzioaren beharrik ez izatea. Adi egongo gara".

Erlazionatuak

Beharra dutenei laguntzeko Zaintza Sarea osatu dute Gorliz, Lemoiz eta Plentzian

COVID-19 krisiaren eraginez Plentzian, Gorlizen eta Lemoizen premia duten pertsonek laguntzeko sarea sortu dute. Gurutze Gorriaren; Plentzia, Gorli...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun