Hondakin-urak itsasadarrera isurtzen direla salatu dute hainbat taldek, eta Ur Partzuergoak ukatu egin du

Itsasadarra Erandion. CC-ZARATEMAN

Erandioko Auzokideok eta Getxoko Auzokideok elkarteek, Eguzki eta Ekologistak Martxan talde ekologistakaz batera, salatu dute Bilbao Bizkaia Ur Partzuergoak hondakin-urak botatzen dituela Bilboko itsasadarrera, "justifikaziorik gabe". Partzuergoak, prentsa-ohar baten bidez, "zabaldutako informazioa erabat faltsua" dela erantzun du.

Salaketa egin dute taldeen esanetan, "azken urteetan ohikoak bihurtu dira isurketa horiek, osasun publikoan eta ingurumenean izugarrizko eragina izan arren". Diotenez, urtero, ekain, uztail eta abuztuan (bainu-sasoian, hortaz), milaka metro kubo hondakin-ur botatzen ditu Galindoko araztegiak itsasadarreko uretara. "Era berean, Partzuergoak astero isurtzen ditu ur beltzak zuzenean itsasadarrera, Lamiakon duen punpatze-estaziotik", gaineratu dute.

Egoera larritzat jo dute lau taldeok, eta bai Partzuergoak bai URAk (Uraren Euskal Agentziak) azalpenak eman ditzatela eskatu dute.

Ur Partzuergoaren erantzuna ia berehala etorri da: "Zabaldutako informazioa erabat faltsua da, eta talde berberek uztailean eta abuztuan zabaldutako antzeko prentsa-oharrak ere guztiz faltsuak ziren". Adierazi dutenez, ez Galindoko (Sestao) araztegiak "ez Bilbao Bizkaia Ur Partzuergoak kudeatzen duen beste ezein instalaziok edo saneamendu-sistemak", ez du gainezka egiten euririk egiten ez duenean, eta euriaren ondorioz hala denean berehala jakinarazten diote URAri. 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun