Beharsarea webgunea berritu dute

Lana euskaraz bilatu eta topatzeko aukera ematen duen Beharsarea webgunea eguneratu eta bestelako itxura eman diote haren arduradunek. Alkarbidek bideratutako ekimena da, hau da, Bizkaiko euskara-teknikarien foroak, Aldundiaren menpe dagoenak, eta Uribe Kostari dagokionez, Getxon, Erandion eta Mankomunitateko sei herritan ematen du zerbitzua.

Doako zerbitzua ematen du Beharsareak, bai lana bilatu bai behargin bila dabiltzanentzat. Bertara bidalitako iragarkiak argitaratu eta erabiltzaileen arteko harremana errazten du. Baldintza bi daude: lanak euskaraz egitea, eta kondizio duinetan egitea.

Helburu nagusia lan-alorrean euskararen erabilera sustatzea da, arduradunen esanetan. Zerbitzua eskualdeka antolatuta dago; horietako bat Getxo da, beste bat Erandio eta beste bat Uribe Kosta. Mankomunitateko herri denak sartzen dira hor, Berango izan ezik. Dena dela, berez ez zaio inori mugarik ipintzen herri batekoa edo bestekoa izateagatik.   

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun