Uribe Kostako Irakurzaleen Txokoari hasiera emango diote urriaren 29an

Gaur egungo osasun-egoera dela eta, lekuak mugatuta egongo dira solasaldietan. Horretarako, hilabetearen hasieran irekiko dituzte izen-emateak eta solasaldiko astean bertan jakinaraziko dute zeintzuk leku egokitu diren. Ikasturteko lehenengo solasaldian Jokin De Pedro izango da protagonista, haren Joana liburuagaz.

Literatura-mundua gustuko dutenen topagune bilakatu da azken urteotan Uribe Kostako Irakurzaleen Txokoa. Hilez hil bertan elkartzen dira eskualdeko lagunak, idazle edo itzultzaile ezagun bategaz solasaldian aritzeko. "Taldean egoteak, elkarrekin egiteak are gehiago motibatzen gaitu irakurtzera, eta gozatzera", azaldu dute antolatzaileek.

Egungo egoera kontuan hartuta, lekuak mugatuak egongo diren arren, inor ez dadin solasalditik kanpo gelditu, online ere eskainiko dituzte saioak (Jitsi Meet bidez). Solasaldira sartzeko esteka emailez helaraziko diete interesatuei. Era berean, solasaldian zehar segurtasun-distantziak mantenduko dituzte eta derrigorrezkoa izango da musukoa erabiltzea eta gel desinfektatzailea erabiltzea.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun