Hiri turistikoetako brontzezko eskulturek demostratzen dute argien Duchampen esaldiaren azertua. Logika bera baita. Jendearen igurtziak mantentzen ditu dirdiratsu, bestela lohituak diruditen giza irudi horien esku, sorbalda edo bestelako atalak. Keinu horrekin, bertatik eskua pasa zuten guztiei ematen die eskua bisitariak.
Durangoko Plateruena itxiko dela jakitean etorri zitzaidan gogora Duchampena lehenik. Bilkurarako gune bat galduko baitu kulturak, orokorrean, eta euskal kulturak, konkretuan. Durangoko Azokan salmahairik ez dela egongo jakinarazi zutenean agertu zitzaidan Duchamp bigarrenez. Erakusmahaiz erakusmahai egindako paseorik gabe, euskal kulturarekin duen hartu-eman bakarra galduko duelako askok. Bizkaiko Bertsolari Txapelketa ere atzeratzea erabaki dute, eta ikusi behar txapelketa orokorrarekin zer. Galera handiak dira kulturgintzarentzat, orokorrean, eta euskal kulturarentzat, zehazki, euskalgintzarekin partekatutako bidegurutze horietatik kanpo, maiz ikusezina baita euskarazko sorkuntza. Pandemiaren eraginez, beraz, igurtzia galduko du euskal kulturak, gutxienez urte betez. Pisuzkoa da datua, ikerketen arabera igurtzi horrek ematen baitie euskarazko artelanei bilkura izaera. Gero, denon esku egongo da dirdira ere ez galtzea.