Herriko merkataritza euskaraz sustatzen duen Kaishop! kanpaina martxan jarri dute berriro

Getxoko eta Erandioko udalek, Bizkaiko beste hainbat udalakaz (Gernika, Basauri, Muskiz, Mungia, Etxebarri) eta Txorierriko Mankomunitateagaz batera, Kaishop! kanpaina sustatuko dute berriro, udalerriko merkataritza bultzatzeko eta euskararen erabilera sustatzeko. Alkarbide, Euskara Zerbitzuen bilgunearen eta Bizkaiko Foru Aldundiaren laguntzagaz, oraingo leloa "Kaishop! Zer gura dozu? Erosi euskaraz, herrian!" da.

Irantzu Uriarte Getxoko Euskara zinegotziak azaldu duenez, egitasmo horren helburua da tokiko merkataritzak eskaintzen duen tratu pertsonal eta hurbila, kalitatezko produktuak hurbil erosteko aukera eta euskarak tokiko merkataritzan duen garrantzia aitortzea.

Azaroaren 20ra arte indarrean izango den kanpainaren helburuak nabarmentzeko bi bideo zabalduko dira. Lehenengoan, online erosi gura duen bezero batek zailtasunak dituela ikusiko da eta herriko denda bat topatuko du bere erosketa egiteko; bigarrenean, Sara Gandara aurkezleak herrian erosteko gomendioa egingo du. Karteletan Sara Gandararen irudia ikus daiteke eta poltsak ere banatuko dituzte, ideiak azpimarratzeko.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun