Uribe Kostako Mankomunitateko gazteen beharrizanak ezagutzeko inkesta egingo dute online

Uribe Kostako Mankomunitatea osatzen duten zazpi udalek eta Bizkaiko Foru Aldundiak 15 eta 30 urte bitarteko gazteei zuzendutako #Zure iritzia jakin nahi dugu galdetegia prestatu dute, "Uribe Kostako gazteek dituzten eskakizunak eta beharrizanak jasotzeko eta eskualdeko gazteria-politiken ebaluazio zehatza egiteko". Abenduaren 15era arte egongo da parte hartzeko aukera, internet bidez. 

Eurentzat beren-beregi sortutako erakundeen programak ezagutzen ote dituzten itaunduko diete gazteei, eta baiezkoan, horien gainean duten iritzia emateko ere eskatuko diete. Zehazki, eskualdean martxan ipinitako hainbat programa eta Aldundiaren Gaztedi Bizkaia aipatzen ditu galdetegiak. Beharrizanen gainean ere galdetzen dute, modu orokorragoan.

Jasotzen dutenei eskatu diete ahalik eta pertsona gehienengana helarazteko inkesta, sare sozialak eta bestelako bideak erabiliz.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun