Zaintza-lanak aitortzea eskatzeko greba deitu dute martxoaren 4rako

ELA, LAB, CCOO eta ESK sindikatuek deituta, EAEko gizarte zerbitzuek greba egingo dute bihar, eguenean, zaintza-lanetan aitortza eskatzeko. Bilboko deialdiaz gainera, herrietan ere mobilizazioak egingo dituzte, hala nola Algortan; 18:00etan jarri dute hitzordua, Getxoko udaletxearen aurreko San Ignazio parkean.

Eskumaldeko LAB sindikatuak deitoratu duenez, gaur egungo gizarte-zerbitzuen sistemaren erantzukizuna publikoa den arren, zerbitzu gehienak pribatizatuta edo azpikontratatuta daude, eta, ondorioz, "enpresen onura ekonomikoak onura asistentzialei gailentzen zaizkie, kasu askotan zerbitzu eskasak eskainiz, zaintza duina ezin bermatuz eta, are gutxiago, egoerei egokitutako zerbitzu bat emanez".

Gaur egun gizarte-zerbitzuek bizi duten egoerak ere beharginen lan baldintzetan eragiten duela salatu du sindikatuak: "Txanda amaigabeak, soldata lotsagarriak, langileen osasuna larriki kaltetzen duen lan-erritmoa, lan-karga eta zerbitzuen kalitate eskasa langile-faltagatik".

Hori guztia dela eta, biharko, martxoaren 4ko, greba inflexio-puntu bat gehiago izan duela azpimarratu du sindikatuak, zaintza-funtzioa aitortzeko borroka kolektiboan eta kalitatezko zaintzak jasotzeko eskubidean, besteak beste. Horretarako, aldarrikatu dute zuzeneko kudeaketarako sistema publiko unibertsala, doakoa eta komunitarioa izango dena, kalitatezko zerbitzuaren eta emandako funtzioari egokitutako lan-baldintzen bermatzaile gisa eta prekarietate-faktorerik gabekoa.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun