Enplegu publikoaren aldeko greba egingo dute gaur

Greba ere egin dute EHUko Leioako campusean. © STEILAS

Zerbitzu publikoak defendatzeko eta enplegu publikoa sendotzeko greba deialdia egin dute sindikatuek gaurko, apirilaren 22rako. Eguneko lehenengo orduetan jarraipen zabala izan duela adierazi dute deitzaileek, eta 11:30ean, manifestazioa egingo dute EAEko hiru hiriburuetan.

ELA, LAB, CCOO, SATSE, ESK eta Steilas sindikatuek deituta, greba egiten ari dira gaur, sektore publikoan enplegua sendotzeko eta hori sortzea aldarrikatzeko. Sindikatuek adierazi dute 60.000 langile publiko daudela kontratu finko barik, eta horien egoera "erabat larria" dela.

Sindikatuak pozik agertu dira eguneko lehenengo orduetan grebak izan duen jarraipenagaz, batez ere behin-behinekotasuna pairatzen duten langile publikoen erantzunagatik. Hala ere, deitoratu dute greba oso baldintzatuta egon dela Eusko Jaurlaritzak ezarri dituen "neurriz kanpoko" zerbitzu-minimoengatik; adierazi dutenez, milaka langileri greba eskubidea ukatu zaie.

Besteak beste, ezarritako zerbitzu minimoak % 100ekoak izan dira Osakidetzan, COVID-19agatik egiten ari diren ekintzak direla eta. Sindikatuek salatu dute pandemia "aitzakia" gisa erabili dutela greba eskubidea urratzeko.

Sindikatuek manifestazioak deitu dituzte EAEko hiriburuetan; hala, 11:30ean, Bilbo, Gasteiz eta Donostian batuko dira. Bilboko manifestazioa Jesusen Bihotza plazatik abiatuko da.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun