Adinekoentzako lau ikastaro eskainiko ditu Uribe Kostako Zerbitzu Mankomunitateak

Besteak beste, adinekoentzako yoga ikastaroa eskainiko dute.

Gurutze Gorriak eta Uribe Kostako Zerbitzu Mankomunitateak beste lau ikastaro eskainiko dituzte adineko pertsonentzako maiatzean. Oraingo honetan dantza, gimnasia funtzionala, estimulazio kognitiboa eta yoga ikastaroak izango dira.

Uribe Kostako Zerbitzu Mankomunitateak eta Gurutze Gorriak apirilean abiarazitako adinekoentzako doako ikastaroen arrakasta ikusita, beste lau ikastaro berri jarri dituzte martxan maiatzerako.

Beste behin, Uribe Kostako udalerrietan erroldatuta dauden adineko pertsonei zuzendutako doako jarduerak izango dira, eta Gurutze Gorriaren bulegoan emango dira (Landabe kalea, 14, Sopela), aurrez aurre eta segurtasun-neurri guztiak hartuta.

Hauek dira, hain zuzen ere, maiatzerako antolatu dituzten jarduerak:

  • Martitzen guztietan: Dantza (11:30 - 12:30)
  • Eguazten guztietan: Gimnasia funtzionala (11:00 - 12:00)
  • Eguen guztietan: Estimulazio kognitiboa (11:00 - 12:00)
  • Bariku guztietan: Yoga (11:00 - 12:00)

Aurrekoan bezala, plazak mugatuak izango dira (gehienez ere 10 pertsona); beraz, parte hartu gura dutenek Uribe Kostako Gurutze Gorrian bertan edo 946 569 497 / 663 384 379 telefonoetara deituz eman beharko dute izena. Eskaeren arabera, zerbitzu horiek ematen jarraitzeko aukera baloratuko da.

Ekimena, Uribe Kostako Zerbitzu Mankomunitateak eta Gurutze Gorriak iazko irailean adostutako lankidetza hitzarmenaren baitan kokatzen da, zeinaren bitartez gizarteratze-, boluntariotza- eta prestakuntza-programak garatzeko ardura hartu zuten.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun