Espainiako Estatuko bigarren maila litzatekeenera igotzeko aukera izango dute Easygas Berango-Urduliz Eskubaloi Taldeko neskek. Valentzian lehiatuko dira ekainaren 4, 5 eta 6an, hango, Balearretako eta Kataluniako taldeen aurka. "Ez da erraza izango; talde katalanak nahiko konplexuak izaten dira", aurreratu du Diego Izquierdo taldearen entrenatzaileak. "Ez dugu ezer baztertzen: oso talde gazteagaz goaz, bataz beste 20 urte dituzte, eta horrelako igoera fase bat jokatzen dugun lehen aldia da", azaldu du.
"Oraindik ez dugu guztiz sinisten", dio Nati Alcortak, taldeko kapitainak. Aukera horren aurrean, jokalariak oso pozik eta ilusionatuta daude, eta euren helburua "dena eman eta ahalik eta gehien disfrutatzea" izango dela azpimarratu du kapitainak.
"Eskualde osoko taldea gara, izan ere, jokalariak Uribe Kostako herri guztietatik datoz, eta inguruko eskoletan lantzen dugu oinarria"
Euskal Ligan jokatzen aritu da taldea aurten, oso denboraldi "atipikoan", entrenatzailearen arabera: "Mundu guztiari eragin dio pandemiak, baita txapelketari ere; inoiz egin dugun aurre-denboraldi luzeena izan da: irailean hasi behar genuen eta urtarrilean hasi gara jokatzen".
Orain dela 17 urte taldea osatu zenetik, ekipoak emakumezkoen kirolaren aldeko apustua egin du beti; izan ere, gaur egun, taldeko jokalari gehienak neskak dira, eta azken urteetan hazkunde garrantzitsua izan dute.
Entrenatzaileak argi dauka taldeak Zilarrezko Maila lortuko duela: "Agian ez da aurten izango, baina taldearen joera ikusita, eta dugun harrobia kontutan hartuta, horra helduko gara momenturen batean".