Super-heroia

Txikitan, super-heroia izan nahi nuen, hainbat umek bezala, baina beti izan nuen argi nire super-boterea ez zela hegaz egitea.

Naturarekiko gaitasunik ez nuela jabetzean, lanbide arruntaz pentsatzen hasi nintzen. Ikastea gustatu bai, baina ez zitzaidan buruan ezer geratzen. Argi zegoen beste gauza batzuetarako egina nengoela.

Botika-enpresa batera joan nintzen, produktuen saltzailea izateko. Hara non kabroi horiek ingelesa eta frantsesa eskatu zizkidaten; bat barik, hizkuntza bi.

Beste batean saiatu nintzen, industria-makinarira emana, baina bulegoan lan egiteko. Ingelesik bai? Baietz esan nien, ingelesa baneukala. Hiru egun, Alemaniatik hiru dei, iraun nituen enpresan. Nik ingelesa eduki bai, baina oso gordeta, eta ez nuen topatzen; seguruenik alemaniar horrek, berdin. Ez genuen elkar ulertu. Baina hori guztia suertea izan zen, txikitako ametsetara itzuli nintzelako. Beharbada super-heroia ez, baina heroi kategoriara behintzat helduko nintzateke. Suhiltzailea izango nintzen.
Uf! Proba fisikoak oso gogorrak. Ezinik.

Fisikoki erdi prestatuta nengoenez, udaltzain. Oinarriak ikusi eta hara non kabroi hauek euskara eskatzen duten. Salatu egingo dut. Bazterkeria halakorik!

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun