Urriaren 20ra arte

TOKIKOM Sarietako Komunitatearen Saria bozkatzeko epea, zabal-zabalik

Martxan da TOKIKOM Sarien seigarren edizioa, tokiko komunikabideetan egiten den lana aldarrikatu eta gizarteratzeko asmoz. Bederatzi lan finalista aukeratu ditu epaimahaiak, eta, orain, publikoak Komunitatearen Saria aukeratu ahalko du, urriaren 20ra bitartean irekita egongo den bozketaren bidez. 

Bateraguneak antolatzen ditu TOKIKOM Sariak, Eusko Jaurlaritzaren, Nafarroako Gobernuaren eta Bizkaiko zein Gipuzkoako Foru Aldundien babesagaz. 

Urtero bezala, komunikazioan aditua den epaimahai batek hiru sari emango ditu, azken urtean euskarazko toki-komunikabideetan argitaratutako lanik onenak aitortzeko. Epaimahaia EHUko Maria Gonzalez Gorosarrik eta Edorta Aranak, eta Mondragon Unibertsitateko Amaia Pavonek osatzen dute. Haiek arduratuko dira komunikabideek proposatutako 57 lanen artean azalik onena, edukirik onena eta ikus-entzunezkorik onena aukeratzeaz. 

Komunitatearen Saria 

Iaz bezala, laugarren sari bat ere izango da aurten: Komunitatearen Saria. Epaimahaiak proposatutako bederatzi finalistaren artean, publikoaren bozka gehien jasotzen dituen lanak eramango du sari hori, tokiko komunikabideetan hainbesteko pisua duen komunitateari sariotan ere bere ahotsari emateko asmoz. Bozketa egiteko aukera zabalik egongo da urriaren 20ra arte. 

TOKIKOMetik gonbidapena zabaldu dute euskarazko komunikabideen irakurle, ikus-entzule eta erabiltzaile guztiei bozketan parte hartzeko.

Sari-banaketa eta jardunaldiak 

TOKIKOM Sarien banaketa azaroaren 12an izango da, tokiko komunikabideen erronken inguruko jardunaldi batzuen baitan. Ekitaldiaren inguruko xehetasunak laster jakinaraziko ditugu.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun