Getxok bat egin du Mugiment Kirol Txartelagaz, Erandioko, Sopelako eta EAEko beste 50 kiroldegitan doan sartzeko

Fadurako kiroldegia. © GETXOKO UDALA

Getxo Kirolak-eko abonatuek daborduko erabil ditzakete Eusko jaurlaritzak bultzatutako Mugiment Kirol Txartela ekimenagaz bat egiten duten udalerrietako kiroldegian. Gaur egun, 53 euskal udalerri daude ekimenari atxikita, eta horien artean, Getxotik gertu, Bilbo, Sopela, Erandio, Portugalete, Santurtzi eta Barakaldoko kiroldegiak nabarmentzen dira.

Euskadin jarduera fisikoa sustatzeko ekimen horri atxikitako udalerri bakoitzak finkatzen ditu bere instalazioen erabilerari eta ordutegiari buruzko baldintzak. Getxoren kasuan, beste udalerri batzuetan harpidetutako pertsonek erabili ahal izango dituzte, betiere eskuragarri daudenean eta aurretiazko hitzordua hartuta, honako instalazio hauek: Gobelako tenis pistak; eta Fadurako tenis pista irekiak, atletismo pista, belodromoa eta trinketa. Ekipamendu horiek asteko egun guztietan erreserbatu ahal izango dira 8:30etik 16:30era.

Mugiment Kirol Txartela erabiltzeko beharrezkoa da telefono mugikorrerako aplikazioa deskargatzea eta erregistratzea. Atxikitako udal-zerbitzu publikoetako bateko partaide izatea egiaztatu ondoren, txartel birtuala erabiltzen hasi eta erabili gura diren instalazioetara joan daiteke.

Telefono aplikazio berean edo www.kiroltxartela.eus webgunean kontsultatu daitezke kirol zerbitzu bakoitzak interesatuen eskura jartzen dituen instalazioak.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun