Joan den uztailean hasitako 13/13 auziaren sententzia kaleratu du orain gutxi Espainiako Auzitegi Nazionalak. Horretan, zazpi urte eta erdiko espetxe zigorra ezarri zaio Arantza Zulueta abokatuari, eta hiru eta lau urte artekoak Jon Enparantza, Naia Zuriarrain eta Iker Sarriegiri, euskal presoen alde egindako lanagatik; epaiketara deitutako beste hiru kideak absolbitu dituzte.
Sententzia hori bidegabekeri bat dela salatu dute eskualdeko hainbat herritarrek egunotan, "zigor hauek konponbide demokratikoa oztopatzen dutelako". Hala, dozenaka lagunek elkarretaratzeak egin dituzte zapatu-domekan Berangon, Erandion, Itzubaltzeta/Romon eta Sopelan. Gaur, astelehenean, gainera, hainbat lagunek Algortako Makaleta etorbidea, Fadura parean, ekintza informatibo bat egin dute sententziaren nondik norakoak azaldu eta deitoratzeko.
Joan den uztailean hasitako auziaren sententziak zazpi urte eta erdirainoko espetxe-zigorrak ezarri gura dizkie presoen eskubideen defentsan lan egin zuten zazpi pertsonari pic.twitter.com/Dft0l0rPow
— Iker Rincon (@irincon_) April 4, 2022
Kritikatu dutenez, sententzia hori injustizia bat da, "irregulartasunez eta eskubide urraketez gainera, berme juridiko oso gutxirekin burututako epaiketa baten ondorioz hartutakoa delako".
"Gure herrian konponbide demokratikorako hasitako aro berriaren ostean, 'dena ETA da' printzipioa oinarri duten jarduerak salatu nahi ditugu. 13/13 makro-epaiketa denboraz eta lekuz kanpokoa izan da, eta Euskal Herrian elkarbizitza demokratikoa eraikitzeko herritarron gehiengoa egiten ari garen bidearen kontrako norabidean da", azaldu dute.
Horregatik, sententziarekiko sumina kaleetara eramateko asmoz, apirilaren 9an, zapatuan, Bilboko Jesusen Bihotzetik 17:30ean hasiko den manifestazioan parte hartzeko deia egin dute.