Pentsiodunen Mugimenduko I. Bizikleta Martxak Uribe Kosta zeharkatu du

Ander Zarraga 2022ko eka. 17a, 11:22
Euskal Herriko Pentsiodunen Mugimenduaren I. Bizikleta Martxa Donostiako kaleetatik zehar. © NOAUA

Lehenengo aldiz antolatu duten bizikleta-martxa hau Donostiatik atera zen hilaren 13an eta 25era arte Euskal Herriari itzulia emango dio. Gaur, Plentziatik atera eta eskualdeko herriak zeharkatu ditu Bilbora bidean, tartean, txirrindulariei harrera egin diete Getxon eta Leioan.

Ekimen honen bidez, Euskal Herriko Pentsiodunen Mugimenduak urte hauetan behin eta berriro nabarmendu dituen bere hiru aldarrikapen nagusiak barreiatu gura ditu: 1.080 euroko gutxiengoko pentsioa, zerbitzu publikoen defentsa eta zaintza-lanen partekatzea.

Horretarako, 13 egunetan 30 bat lagunek osatutako pelotoiak 700 kilometro egingo ditu Euskal Herriko hainbat udalerri zeharkatuz, "Pauso bakoitzak, pedalkada bakoitzak, asko balio du" lelopean. Bizikleta-martxaren helmuga Donostia izango da, hilaren 25ean manifestazioa egingo baitute Alderdi Ederretik abiatuta, 12:00etan.

Bitartean, gaur goizean, hilak 17, txirrindulariei harrera egin diete Getxoko Makaleta etorbidean lehenik eta Leioako Euskal Etxeen plazan ondoren. Halaber, mugimenduko kideek balkoietan Pentsiodunen Mugimenduko zapia jartzeko eskatu diete herritarrei, euren aldarrikapenakaz bat egiteko.

 

Etapak

  • Ekainak 13, 1. etapa: Donostia-Azpeitia (Usurbildik igaroko da).
  • Ekainak 14, 2. etapa: Azpeitia-Ondarru.
  • Ekainak 15, 3. etapa: Ondarru-Amorebieta-Etxano.
  • Ekainak 16, 4. etapa: Amorebieta-Etxano-Plentzia.
  • Ekainak 17, 5. etapa: Plentzia-Bilbo.
  • Ekainak 18, 6. etapa: Bilbo-Amurrio.
  • Ekainak 19, 7. etapa: Amurrio-Gasteiz.
  • Ekainak 20, 8. etapa: Gasteiz-Altsasu.
  • Ekainak 21, 9. etapa: Altsasu-Iruñea.
  • Ekainak 22, 10. etapa: Iruñea-Bera.
  • Ekainak 23, 11. etapa: Bera-Baiona.
  • Ekainak 24, 12. etapa: Baiona-Irun.
  • Ekainak 25, 13. etapa: Irun-Donostia. 12:00etan manifestazioa Donostiako Alderdi Ederretik.
Jendartea Getxo Leioa Plentzia
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun