Eskualdeko jaietan ez dutela inolako erasorik onartuko azpimarratu dute Uribe Kostako neska feminista gazteek

Uribe Kostako hainbat herritako neska feminista gazteen taldeek prentsaurrekoa egin dute Leioan jai-giroaren itzuleragaz batera autodefentsa feministaren aldarrikapena egiteko. Eskualdeko udako jaiak hasiko dira egunotan, eta, hori dela eta, argi utzi gura izan dute uda honetako jaietan ez dutela eraso "bat bera ere" onartuko, "eta jai eremua emakumeontzako* espazio seguru izatea nahi dugula".

Leioan egindako prentsaurrekoan eskualdeko neska feminista gazteen taldeek gogoratu dute zer gertatu ohi den festa giroan, jende pilaketa artean, "desfasearen eta alkoholaren aitzakiapean jasaten ditugun eraso guztiak: drogatzen gaituzue, espazioa zureganatzen duzue eta guri lapurtu, jarrera biolentoak dituzue, lehen lerroak okupatzen dituzue, ipurdia ukitzen diguzue, bortxatzen gaituzue, jarrera horien aurrean zieun inguruko gizonak babesten dituzue...".

Hori guztia zerrendatuta, prentsaurrekoan bildutakoek argi dute eraso horiek guztiek zapalkuntza estruktural bati erantzuten diotela, eta "sistema zisheteropatriarkala ondorio direla". Hori dela eta, gizonei dagokien ardura har dezatela eskatu diete.

Hala ere, hori egin bitartean, talde feministek protokoloak, brigada moreak, asanblada feministak egiten jarraituko dutela iragarri dute: "Zuek jai eremuan bazaudete, gu ez gaudelako seguru. Saretuta gaude, antolatuta gaude eta aurrean izango gaituzue".

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun