Beñat Amade getxoztarrak eta Eneko Bilbao kortezubitarrak herri kiroletako apustu bat itxi zuten atzo, domekan, Kanon jatetxean. Proba urtarrilaren 21ean jokatuko dute, 18:00etan, Urdulizko probalekuan (frontoia), oraindino guztiz konfirmatzerik izan ez badute ere. Denera, HIRUKAri jakinarazi diotenez, 2.000 euro jarri dituzte mahai-gainean.
Urtarrilaren akabuan jokatuko duten herri kirolen desafioan, bizkaitarrek 100 kilogramoko bola 30 aldiz altxatu beharko dute; ondoren, 400 kilogramoko harria sei alditan gurutzatu beharko dute plaza, giza-frogan; eta, azkenik, lau kilometro egin beharko dituzte korrika.
Beñat Amade getxoztarra Euskal Herriko eta Bizkaiko txapelduna da lasto-altxaketan, 85 kilo azpitik; gainera, azken urteotan pentatloietan dabil buru-belarri. Bere aldetik, Kortezubiko Eneko Bilbao Euskal Herriko txapelduna izan da giza-proban, 85 kilo azpitik, eta Bizkaiko txapelduna absolutuan. Munduko txapelduna ere izan da, eta, azken urteetan, harri-jasotzean dabil.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
