Berango Gazte Lab

Digitalizazioaren inguruko lan-gaitasunak hobetzeko ikastaroa eskainiko diete eskualdeko gazteei

Ander Zarraga 2022ko urr. 20a, 13:07
Ikastaro bat Berango Gazte Laben, artxiboko irudian. © BERANGO GAZTE LAB

Urriaren 26tik azaroaren 30era bitartean, Berango Gazte Laben eskualdeko 15 eta 29 urte bitarteko gazteei zuzendutako digitalizazioaren inguruko ikastaro bat eskainiko dute. Bertan, egungo lan-munduan eskatzen diren betebehar digitalak ikasteko aukera izango dute, hala nola datu-base publikoak, datuen babesa, Linkedin-en erabilera...

Gaur egungo ia lan-esparru guztietan enpresen eta erakundeen digitalizazioa erabatekoa da, legeak enpresei eskatzen dizkien administrazio-tramiteak ere bide horretatik egin behar baitira. Beraz, prozesu horietan sortzen diren eskaera eta dokumentu digitalak kudeatzen eta babesten jakitea berebizikoa da, eta, horretarako, ezagutza jakin batzuk behar dira, bai izapideak egiteko, bai prozedura horien atzean dagoen barruko lana modu egokian kudeatzeko ere.

Zentzu horretan, Berango Gazte Laben eskainiko duten prestakuntzan mundu digitaleko edukiak, hizkuntzak, araudia eta kudeaketa irakatsiko diete bertaratzen diren gazteei. Horren barruan, hainbat programa eta baliabide erabiltzeko jarraibideak jasoko dituzte: Batuz programa, ezagutzaren datu-base publikoak, paperik gabeko bulegoak, datuen babesari buruzko legedia eta Linkedin enplegagarritasunerako plataforma gisa, besteak beste.

Ikastaroa Berango, Barrika, Gorliz, Leioa, Lemoiz, Plentzia, Sopela eta Urdulizko gazteei dago zuzenduta, eta, parte hartzeko, horietariko batean egon beharko da erroldatuta. Ikastaroa doakoa izango da, eta martitzen eta eguazten arratsaldeetan emango dute, urriaren 26tik azaroaren 30era arte. Izen-ematea Berango Gazte Lab webgunearen bitartez egin beharko da.

 

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun