Bizikletak gordetzeko guneak jarriko dituzte Leioa eta Ibarbengoako metro-geltokietan

Ibarbengoako metro-geltokia, artxiboko irudian. © METRO BILBAO

Metro Bilbao kudeatzen duen Bizkaiko Garraio Partzuergoak bizikletak eta patineteak gordetzeko lehen gordailu itxiak jarriko ditu urtea bukatu baino lehen. Barik txartelagaz baliatu ahalko dira eta bizikleta edo patinete elektrikoak kargatzeko entxufeak izango dituzte.

Lehen instalazioak Leioa, Ibarbengoa eta Ansioko geltokietan jarriko dituzte. Egiturek bizikletak eta patineteak eguralditik eta lapurretetatik babesteko izango dira, eta, horretarako, itxiak izango dira eta sarbidea pertsonalizatutako Barik txartelagaz kudeatuko da, nor sartzen den kontrolatzeko. Gainera, instalazioek sare elektrikorako entxufea duten plazak ere izango dituztela iragarri dute, bateria duten ibilgailu elektrikoak ere kargatu ahal izateko.

Bizkaiko Garraio Partzuergoak metroko 1 eta 2 lineetako aipatutako geralekuetan eraiki eta mantenduko ditu instalazio horiek, Eusko Jaurlaritzak eta Bizkaiko Foru Aldundiak emandako diruagaz. Zehazki, 345.000 euro ingurugatik esleituko dituzte lanak, eta urtea bukatu baino lehen eraikitzea aurreikusi dute. 

Aparkalekuak etxola itxurako sei metro koadroko azalera izango duten egiturak izango dira, 2,5 metroko altueragaz eta geltokien ondoan kokatuko dituzte. Leioan Iturriondo kaletik egongo da sarbidea eta daborduko dagoen entxufeari beste bat erantsiko diote. Getxoko Ibarbengoa geltokiko aparkalekura Martiturri Estartatik sartuko da, eta bi entxufe bikoitz izango ditu bizikleta eta patinete elektrikoentzako.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun