Eskualdeko gazteen ekintzailetza sustatzeko programa abiatuko dute

Ander Zarraga 2023ko urt. 25a, 13:02
Gazteak Leioako Behargintzan, artxiboko irudian. © LEIOAKO UDALA

Mankomunitatea osatzen duten udalerrietako eta Leioako gazteen potentzial ekintzaileari bideak errazteko ekimen bikoitza abiatuko dute otsailean. Alde batetik, ideiak proiektu bihurtzen ikasteko lan-taldeak egingo dituzte maiatzera bitartean, eta, bestetik, lanekoak ez diren praktikak egiteko Gaztedi UK bekak eskuratu ahalko dira.

Behargintza Leioak gidatutako ekimena Gaztedi UK erakundeagaz egindako hitzarmenetik sortu dela azaldu dute antolatzaileek; horretarako, Barrika, Berango, Gorliz, Leioa, Lemoiz, Plentzia, Sopela eta Urdulizeko udalek hitzarmenagaz bat egin dute, udalerri horietako gazteen artean ere ekintzailetza sustatzeko helburagaz. Programa berariaz zuzenduta dago aipatutako udalerrietan erroldatutako 18 eta 29 urte artean dauden enpresa-sortzaile gazteei.

Horretarako, Talde ekintzaileak izeneko tailerrak, otsailaren 13tik maiatzaren 12ra bitartean egingo dituzte, astelehen, eguazten eta barikuetan, 09:00etatik 12:00etara. Bertaratzen diren gazteek euren alderik ekintzaileena lantzeko aukera izango dute, metodologia desberdinak erabiliz, Leioako Ibaiondoko enpresa-haztegian.

Izena emateko epea otsailaren 8an itxiko dute, eta Behargintza Leioan (behargintza@leioa.eus edo 94.400.8051) edo gaztegunedigitala@blogspot.com helbidera idatziz egin ahal izango da.

Gaztedi UK Bekak

Bizkaiko Foru Aldundiak, Leioako Udalak eta Uribe Kostako udalerriek, hitzarmen bat sinatu dute 2022-2023 aldirako, gazteriari buruzko politika integrala ezarri, bultzatu eta garatzeko. Horretarako, eskualdeko gazteen artean besteren konturako enplegua sustatzeko asmoagaz, beken programa bat jarri dute abian, lanekoak ez diren praktikak egiteko.

Bekak Barrikan, Berangon, Gorlizen, Leioan, Lemoizen, Plentzian, Sopelan eta Urdulizen erroldatutako 18 eta 29 urte bitarteko gazte tituludunei daude zuzenduta. Horiei esker, bekadunek lau hilabeteko praktikak egin ahal izango dituzte, eta hilean 750 euroko soldata jasoko dute. Izena emateko epea otsailaren 28ra arte egongo da zabalik, Leioako Udalaren egoitza elektronikoan, udaletxean.leioa.eus helbiean.

Gazteok Barrika Berango Gorliz Leioa Lemoiz Plentzia Sopela Urduliz
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun