Asier Borrero preso algortarra Duesoko espetxean dago gaur egun, etxetik 225 kilometrora. 2009an atxilotu zuen Frantziako Poliziak, eta Frantziako Poissyko espetxean (950 kilometrora) eta Mont-de-Marsangoan egon zen preso (215 kilometrora), 2019ko otsailean Espainiako Estatura eraman eta Soto del Realen espetxeratu zuten arte, behin-behinean (370 kilometrora). Bi hilabeteren ondoren, Dueñasera lekualdatu zuten (255 kilometrora), eta, 2021ean, Duesora eraman zuten. 2019ko abenduan, sei urteko espetxe zigorra ezarri zion Espainiako Auzitegi Nazionalak, eta, ondorioz, aurtengo abuztuan beteko ditu zigorraren hiru laurdenak.
Irantzu Gallastegi preso berangoztarraren kasuan, 1994an egin zuen ihes, eta bost urte beranduago, 1999an, atxilotu zuen Frantziako Poliziak. Hango zigorra bete ondoren, 2005ean Espainiaratu zuten eta, 2006an, 30 urteko kartzela zigorra ezarri zion Espainiako Auzitegi Nazionalak; 2024ko azaroan beteko ditu zigorraren hiru laurdenak. Gaur egun, Estremerako espetxean dago, Euskal Herritik 465 kilometrora.