Berangon, Erandion, Lemoizen, Plentzian eta Urdulizen planta fotovoltaikoak jartzea proposatu du Eusko Jaurlaritzak

Iker Rincon Moreno 2023ko mai. 15a, 14:54
Besteak beste, Erandion jarri gura ditu Jaurlaritzak planta fotovoltaikoak.

Eusko Jaurlaritzak hasierako onarpena eman dio Euskadiko Energia Berriztagarrien Lurralde Plan Sektorialari. Plan horretan, 110 parke eoliko eta fotovoltaiko aurreikusita daude. Uribe Kostan ez dira lehenengoak aurreikusten, baina bai bigarrenak, Berangon, Erandion, Lemoizen, Plentzian eta Urdulizen.

Eusko Jaurlaritzako iturriek iragarri dutenez, kokapen horiek guztiak, 57 instalazio eolikoetarako eta beste 53 fotovoltaikoetarako, “autonomia-erkidegoko lurraldearen % 1 baino ez dira”, eta hasierako 110 kokapen horiek “asko” alda litezke izapidetzean.

Dokumentuak etorkizuneko parke eolikoak eta instalazio fotovoltaikoak kokatzeko aukeratutako kokapen-eremuak definitzen ditu. Azken horiei dagokienez, Eusko Jaurlaritzak 23 kokapen proposatu ditu Bizkaian, besteak beste, Berangon, Erandion, Lemoizen, Plentzian eta Urdulizen.

Sailburuaren aginduagaz batera doazen dokumentu ugarietako batean azaltzen denez, energia berriztagarria lortzeko parke horiek ezarri ahal izango diren proposatutako eremuak "Euskadiren potentzial berriztagarria ahalik eta gehien aprobetxatzea lortzeko premisan" aukeratu dira, "Euskadiren natura-, paisaia- eta kultura-ondarea babestearekin bateragarria".

EAEko eta hiru lurralde historikoetako aldizkari ofizialek asteazken honetan argitaratu zuten Arantxa Tapia Ekonomiaren Garapen, Iraunkortasun eta Ingurumeneko sailburuaren agindua, planaren hasierako onespenagaz.

Argitalpen horrek jendaurrean jartzeko izapidea irekitzen du, 45 egunez, alegazioak aurkezteko. Helburua da plana legegintzaldi hau amaitu baino lehen behin betiko onartzea, 2024ko udan amaitzen baita.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun