Maiatzaren 31n, hurrengo eguaztenean, Tabakorik Gabeko Mundu Eguna da, eta, horregatik, Familia eta Komunitateko Medikuntzako Espainiako Elkarteak "Kerik gabeko astea" kanpaina jarriko du abian, maiatzaren 25etik 31ra. Urtero bezala, Uribe Kostako osasun-zentroek kanpainan parte hartuko dute, eta zonaldeko zentro batzuetan ekintza ezberdinak martxan jarriko dituzte: Sopelako ikastetxeetan, esaterako, "kerik gabeko gunea" dioten kartelak ipiniko dituzte, eta, gainera, zentroko irakasleek gutun bana bidaliko diete gurasoei kerik gabeko giroak sortzeko mezuagaz.
Aurtengo kanpainaren erdigunea dira zigarro elektronikoak; izan ere, kontsumitzaileentzat, eta, batez ere, gazteentzat, askoz ere erakargarriagoa da lurrunketa-joera berri hori. Kanpainako antolatzaileek adierazi dutenez, zigarro elektronikoek ere kalte egiten diote osasunari: "Nahiz eta lurrun hitza kaltegabekoa dirudien, zigarro elektroniko batetik ateratzen den aerosola ez da ur-lurruna, eta kaltegarria izan daiteke. Zigarro elektronikoaren aerosolak nikotina eta bestelako substantzia mendekotasun-sortzaileak eduki ditzake, eta horiek biriketako eta bihotzeko gaixotasunak sor ditzakete, bai eta minbizia ere". Hala, argitu dute zigarro elektroniko batzuek ez dutela nikotina, baina, hala ere, "tabakoa kontsumitzen hasteko sarbidea izan daitekeela nerabeentzat".
Halaber, gogorarazi dute Osakidetzako osasun-zentroetan laguntza eskaintzen dutela tabakoa erretzeari uzteko hainbat tratamenduren bidez. Informazio gehiago, hemen.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
