Inguruotako hondartzetara joan diren pertsonen kopurua % 38,39 murriztu da denboraldiaren lehen erdian. Izan ere, uztailean, hareatzetara joan zirenen kopuruak nabarmen egin du behera, batez ere azken hilabete horretako eguraldiagatik. Hala, iaz 1,4 milioi pertsona hurbildu baziren gune natural horietara, aurten 874.934 izan dira, Bizkaiko Foru Aldundiak emandako datuen arabera.
Aurtengo denboraldiaren lehen erdiari hasiera emateko, ekainean hondartzetara joan den jende kopuruak gora egin du (323.276 pertsona, eta 2022an 288.594), hilabete horretan izandako beroaren ondorioz. Hala ere, uztailean baldintza meteorologikoek okerrera egin zuten: egun eguzkitsu gutxiago izan ziren (zortzi, 2022ko 16en aldean), euri egun gehiago (bost egun aurten, bat ere ez 2022an) eta egun aldakor eta lainotsuetan tenperatura baxuagoak izan ziren. Ondorioz, bisitarien fluxua % 51,25 murriztu zen. Zenbaki absolutuetan, 2022ko uztailean 1.131.742 bisitari izatetik aurtengo aldi berean 551.658 bisitari izatera igaro da.
Asistentzia handiena izan duten hondartzak Arriatera-Atxabiribil (102.639 pertsona), La Arena (102.570), Ereaga (102.352), Gorliz (77.714) eta Laga (64.336) izan dira.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
