Astelehenean, hilaren 11n, bainu-eremuetako uretan egindako kontroletan escherichia coli eta hesteetako enterokoko bakteriak antzeman zituzten Areetako, Ereagako eta Arrigunagako (Getxo), Muriolako (Barrika), Plentziako, Gorlizko eta Armintzako (Lemoiz) hondartzetan. Hori dela eta, bainua hartzea debekatu dute hareatza horietan, gaur, eguaztenean, egindako laginketaren emaitzen zain.
Eusko Jaurlaritzako Osasun Sailak gaur, eguaztenean, egindako kontrolaren emaitzak bihar, hilaren 14an, jakinaraziko dituzte eta, horiek araudian adierazitakoagaz bat baldin badatoz, hau da, bakterioen-maila mugen barruan badaude, bainu librea baimenaraziko dute aipatutako hondartzetan.
Arduradunek jakinarazi dutenez, litekeena da domekako eta astelehenetako euriteen ondorio izatea bakterio horien agermenaren arrazoia.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!