Ekin Bidaia gazte ekintzailetzako programa abiarazi dute Uribe Kostan

Nahia Martinez Gondra 2023ko urr. 16a, 12:03
Izena emateko epea urriaren 19an bukatuko da.

Ekin Bidaia gazteekintzailetzako programa abiarazi du Bizkaiko Foru Aldundiak Uribe Kostan eskualdeko Udalakaz duen Gaztedi Uribe Kosta hitzarmenaren bidez. Programa horrek ideia batetik abiatutako proiektu ekintzaileei laguntza ematen die, kontzeptu horretan sakonduz eta abian jartzeagaz lotutako alderdi guztiak landuz. Horretarako, bidaiaren analogia erabiliko dute: irteeratik (ideia) helmugaraino (azken proiektua), geldialdi desberdinez osatutako ibilbidea egingo dute. Parte hartzeko ondorengo inprimakia bete daiteke urriaren 19a baino lehen: izen-ematea hemen.

Bidaia hau herri hauetako batean erroldatuta dauden 18 eta 35 urte bitarteko gazteei zuzenduta dago: Lemoiz, Barrika, Berango, Gorliz, Leioa, Plentzia, Sopela edo Urduliz.

Programak helburu hauek ditu: trebetasun eta ezagutza profesional eta pertsonaletan sakontzea; gazteei ekintzailetza-trebetasunak ematea; proiektu ekintzaile baten ideian lan egitea; negozio-eredu bat planifikatzea, hura abian jartzeko garrantzitsuak diren alderdi guztiak landuz; komunikaziorako tresnak eta trebetasunak lantzea eta proiektu ekintzaile bat diseinatzea ideia batetik abiatuta.

Bidaia amaitzeko, talde-lana egiteko aurrez aurreko formakuntza saioak eta banakako tutoretzak eskainiko dituzte, parte hartzen duten pertsonek hasiera-hasieratik beren proiektua gauzatzeko laguntza izan dezaten.

Hauek dira programaren edukiak:

  • Irteera. Zer sartuko dut maletan? Zeharkako trebetasunak.
  • ​​1. geldialdia. Helburu esklusiboa aukeratu. Ideiatik balio-proposamenera.
  • ​​ 2. geldialdia. Helburua ezagutzea. Bezeroen segmentua.
  • ​​ 3. geldialdia. Aktibatu zure GPSa. Salmenta-bideak.
  • ​​ 4. geldialdia. Zure iparrorratza. Komunikazio- eta marketin-plana.
  • ​​ 5. geldialdia. Bidaia-aurrekontua. Analisi ekonomiko-finantzarioa.
  • ​​ 6. geldialdia. Nor da zure bidaia-laguna? Aliantzak.
  • ​​Helmuga: Demo Day. Proiektuen aurkezpena.

Aurrez aurreko saioak urriaren 20tik abenduaren 15era bitartean egingo dituzte, barikuetan 16:00etatik 19:00etara, Leioako enpresa-mintegian (Ibaiondo plaza, 1. Leioa). Tutoretzak online izango dira. Informazioa gehiago hemen.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun