Uribe Kostako herritar gehienek ez dute etxeko hondakin organikoak zuzen bereizten

Nahia Martinez Gondra 2023ko aza. 29a, 13:54
Lorategi eta inausketa hondarrak, materia organikoa eta zelulosak dira Uribe Kostako hondakinen ia % 50.

Hondakinak prebenitzeko Europako Astean, azaroaren 18tik 26ra izan dena, Uribe Kostako Zerbitzu Mankomunitateak eskualdeko hondakinen karakterizazio lanak egin zituen: hondakina osatzen duten zatikiak bereiztean eta sailkatzean datzan ikerketa burutu zuen. Emaitzek argi islatzen dute oraindino Uribe Kostako herritar gehienek ez dutela etxeko hondakin organikoak zuzen bereizten.

Ikerketako ondorioetan aipatzekoa da herrietako edukiontzietan, “errefusan”, agertzen den inausketako hondar begetalen kantitate handia. Horrez gain, datuen arabera oraindino jendeak ez du behar bezala ontzi arinak eta oihalak/arropa zuzen bereizten.

Hala, lorategi eta inausketak hondarrak (% 17,13), materia organikoa (% 16,37) eta zelulosak (% 15,66) dira Uribe Kostako hondakinen ia % 50. Ontzi arinak (% 9,95), ehunak (% 9,67) eta material sailkaezina (% 9,73) dira beste hiru hondakin multzo nagusiak, baita osasun-hondarrak ere (% 3,39).

Errefusaren frakzioa karakterizatzea eta bertan aurkitzen den “inpropio” kopurua jakitea ezinbestezkoa da eskualdeko herrietan biltzen diren hondakinen ezaugarriak ezagutzeko. Horrela, hondakinen prebentzioa eta kudeaketa hobetzeko aukerak bideratu daitezke, egungo hondakinen legeak ezartzen dituen helburuak erdiesteko.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun