Luzea da langile borrokaren eta borroka sozialen historia gure eskualdean; langileok protagonista izan gara, eta LAB bidelagun. Sustraiak gure herrian, Euskal Herrian, dituen sindikatua gara. Erandioko astilleroetan, Mungiako poligonoetan, Txorierri luze-zabalean… lantoki handi zein txikietan eta kalean LABeko militanteek 50 urtez egindako lanak ekarri gaitu honaino.
50 urteko lan honek egin du LAB errotutako sustraiak, enbor sendoa eta zabaltzen ari diren adaxkak dituen sindikatua izatea. Enbor sendoa, konbikzio sendoak, independentzia eta sozialismoa ADNan dituen zuhaitza da gurea, feminismoz, ekologismoz, antiarrazismoz eta euskaltzaletasunez gaurkotua, adarrak etorkizunari zabalik dituena, indibidualismoaren eta prekarizazioaren aurrean, borroka berrien gotorleku izateko.
Gero eta gehiago gara. Eta zabaltzen jarraituko dugu, gure eskaintza sindikala Euskal Herrian bizi eta lan egiten duten langile guztientzat tresna izateko, borrokarekin lan- eta bizi-baldintzak hobetzeko, herri hobe baten bizitzeko. Borrokan elkartuko gara berriro.