Hemen duzue entzungai Daniel de Miguel Avecilla ALBEko bertsolariak maiatzeko HIRUKArako bidalitako argazkiari emandako erantzun ederra.
Doinua: Bizitza ez da nehoiz egoiten
Luzaro bizi, laurogeigarren
urtebetetze-eguna;
edo mundua ikustekotan
lau hanketako laguna;
haurra altzoan, sabel barruan,
guraso berri, haurduna;
sorpresa ala esperokoa
gogorra samur-biguna;
halabeharrez hartu behar da
bizitzak dakarkiguna.
Datorren hori asmatzekotan
airera dadoa bota,
kapritxosoa baita sarritan
banaketaren azoka,
nola hasten da? zer da erdian?
zelan amaitzen da soka?
Lasai ibili munduan ala
une orotan borroka,
eguneroko jarduera bat
bihurtzen bada erronka.
Mugikortasun urria ere
patuak badu ekarri,
samurragoa bada, seguru,
lagunduz gero elkarri.
Edonor egon liteke eta
halako batean sarri,
bakardadean zer sentitzen den
inork nahi badu igarri,
beiran begia ipini eta
beraien lekuan (ez) jarri.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!