Uribe Kostako Itaiak salatu duenez, 2022an EAEn egin ziren abortuen % 95a klinika pribatuetan egin ziren: "Osakidetzak haurdunaldi eteteak egiteko hitzarmena du zenbait klinika pribaturekin. Modu horretan, osasun sistema pribatuaren atzean dauden enpresari eta politikariek haien poltsikoak betetzen dituzte".
Horregatik, zerbitzu horretara jo behar izan duten hainbat emakumeren kexak nabarmendu dituzte. Besteak beste, deitoratu dute emakumeei ez zaiela erabaki bat hartzeko informazio nahikorik ematen edo emandakoa "faltsua" izaten dela; kliniketan emakumeen "konfidentzialtasuna" bermatzen ez dela salatu dute eta Osakidetzak interbentzioen jarraipena egiten ez duela ere kritikatu dute, egiten dutenean, "mediku aldaketa" gertatzen dela seinalatuz.
