Lanbide Heziketako hizkuntza normalizaziorako batzordeak eta euskararen egoeraz arduratuta gauden irakasleek antolatutako ekimen honen helburua bikoitza da: batetik, Lanbide Heziketan euskarak duen presentziaren inguruan hausnarketa piztea, eta, bestetik, Lanbide Heziketa euskaraz izan dadin aurrera egiteko bidean proposamenak elkarregaz adostu gura dituzte.
"Urteak Aurrera doaz eta Lanbide Heziketan aldaketak gauzatzeko apustu sendoak behar direla sinistuta gaude; izan ere, euskarak duen presentzia, erabilera eta errealitatea saldu izan digutenaren oso bestelakoa da. Beti ere, lurralde eta herrien desberdintasunak kontutan harturik", azaldu dute ekimenaren deialdian.
Hala, ekainaren 26an, Bizkaiko beste zentro batzuekaz batera, Erandioko Tartanga LHIItik eta Leioako Ostalaritza Eskolatik abiatuko dira bizikletaz Arabara bidean, Gasteizko Mendizabalan ekimenak izango duten lehen hitzordura ailegatzeko. Bigarren jardunaldian, Nafarroara joango dira eta Iruñeko Donapea Lanbide Heziketa institutura joango dira, Gasteizen bezala, ekimenaren asmoak partekatzeko. Azken egunean, ekainaren 28an, Iruñetik Tolosaldea LH institutura joango dira, "bertako errealitatea jaso, partekatu eta saretzeko asmoz".