Brangoko Elkar Kirol Elkarteak antolatzen duen froga Estatuko kadete egutegiko probarik onenen artean dago, eta etorkizunean zeresana emango duten txirrindulariak ikusteko aukera eskaintzen du. Guztira, lasterkariek 176,3 kilometro eta 2.459 metroko desnibel positiboa izango dituzte aurretik, hiru etapetan banatuta.
Lehen proba barikuan egingo dute, 18:00etan, Astrabuduatik abiatu eta bertan bukatuko den 65,4 kilometroko ibilbideagaz. Bidetik, Akarlandara igoko dira, eta horrek garaipenerako hautagaien pistak eman ditzake.
Zapatuan, ekainaren 29an, 12:00etan, lasterketa Leioan hasi eta amaituko da 62 kilometroko ibilbideagaz. Hori, aurrekoa baino gogorragoa izango da, ondo bereizitako bi zatitan banatuta: lehen zatian, Unbe gaineko bi igoerakaz, ibilbide gogorra izango duena, ihesaldi saiakeretarako aproposa, eta, bigarren zatian, aldiz, etengabe igotzen eta jaisten joango den hiri-ibilbide bihurria izango dute txirrindulariek. Hasierako ihesaldi saiakerek fruiturik ematen ez badute, garaipena azken hiru itzulietako aldapetan erabakiko dute.
Azkenik, domekan, Berangoren txanda izango da 52 kilometroko ibilbide bategaz. 11:00etan hasiko den lasterketak metro laurik izango ez duen ibilbidetik egingo da, eta Pozozable 2. mailako bi igoerak nabarmentzen dira horretan. Lasterkariek tarte batzuetan aurkituko dituzten % 17rainoko aldapek etapako irabazlearen aukeraketa egingo dute, eta agian baita Txumako sailkapen nagusiarena ere.